Romaría fluvial con centos de embarcacións engalanadas que soben polo río Mandeo ata Os Caneiros para celebrar unha tarde de música, baile, bebida e amizade

A orixe da outra gran tradición ligada ao calendario festivo do mes de agosto ten pouco que ver coa festa actual. A xira fluvial dos Caneiros comezou no outro río que atravesa a cidade, o Mendo, e tiña relación coa desaparecida capela de San Bernardo, no mosteiro das Cascas, onde existía unha celebración o día da súa festividade, o 20 de agosto. Coa apertura da estrada de Santiago e a desaparición desta capela, a festa trasladouse ao día 17 para o campo das Cascas, un terreo plantado con álamos na beira do río Mendo. O final da tradición do Mendo coincide coa inauguración, en 1902, do Lavadoiro Gratuíto das Cascas, ideado polos irmáns García Naveira. A primeira xira polo Mandeo da que se ten constancia aparece recollida no xornal de 1889. A partir do século XX o evento vai aumentando en tamaño e participantes, que chegan a sumar centos de embarcacións. Prémianse as mellor decoradas con flores, faroliños de papel etc. Tamén se celebran o 25 de agosto para dar fin ás festas patronais. Esta segunda romaría é coñecida popularmente como "Os Caneiros da Coruña” debido a que había moita afluencia de veciñanza da cidade.