Festa solemne do 8 de setembro na honra da Virxe dos Remedios, con misas multitudinarias e unha procesión moi concorrida.

Celébrase o día 8 de setembro. Esta festa é a principal, a máis solemne e concorrida; asisten devotos de toda a comarca desde Ferrol, Oza dos Ríos, Paderne... e non digamos de Betanzos. As misas das oito, nove, dez e once son un abarrote. Non hai moitos anos os devotos/as subían a rúa de xeonllos, case sempre na compaña de familiares ou amizades que lles daban a man, apoiábanse nun pau ou simplemente en soidade; o máis usual era levar os xeonllos protexidos cunhas xeonlleiras de fabricación caseira; nalgún caso raro, para expresar maior sacrificio subíana a pel descuberta e, está claro, facíanselles feridas sanguentas. As visitas á imaxe da Virxe dos Remedios son continuas e a procesión en horario de tarde é sempre moi concorrida.