Trátase dunha representación dos dous irmáns García Naveira, Juan e Xesús, como aclara a inscrición situada baixo ambas as figuras: “GARCÍA HERMANOS”. Sobre un pedestal de granito repousa outro de mármore de Carrara, o mesmo material da propia estatua, seguindo un esquema idéntico ao da Estatua da Caridade. A Caridade e Juan sosteñen sendos auriculares e manteñen unha conversación. Xesús, pola súa banda, sinala cara ao edificio das Escolas e do Asilo García Hermanos, situado nun punto elevado e perfectamente visible desde o Pasatempo na época. Juan escoita á Caridade, que lle fala da conveniencia de practicar a caridade, mentres Xesús indica o lugar onde el e o seu irmán a exercen.